ಹಸಿವು ... ಹರಿದ ಚಪ್ಪಲಿ ಮತ್ತು ಸುದ್ದಿ

ನಿಜಾಮನೂರು ಹೈದ್ರಾಬಾದ್‌ಗೂ ನನಗೂ ಭಾರೀ ನಂಟು ಬೆಳೆಯುತ್ತಿದೆ. ಅದು ಮತ್ತೆ ಮತ್ತೆ ನನ್ನ ಸ್ವಾಗತಿಸುತ್ತೆ, ಹೋಗುವ ಕಾರಣ ಏನೇ ಇದ್ರೂ, ಪ್ರತಿ ಬಾರಿಯೂ ವಿಭಿನ್ನವಾದ ಅನುಭವ ನೀಡುತ್ತಿದೆ. ಹೈದ್ರಾಬಾದ್‌ಗೆ ಹೋದ ತಕ್ಷಣ ನೆನಪಾಗೋದು ಅಲ್ಲಿನ ಬಿರ್ಯಾನಿ ಮತ್ತು ಇರಾನಿ ಚಹಾ. ಇವೆರಡನ್ನೂ ಸವಿಯದೇ ಹೋದ್ರೆ ಹೈದ್ರಾಬಾದ್‌ಗೆ ಹೋಗಿದ್ದೇ ದಂಡ ಅನ್ನಿಸಿದರೂ ತಪ್ಪಿಲ್ಲ. ಅದೆಷ್ಟೇ ತುರ್ತು ಸನ್ನಿವೇಶ ಇದ್ರೂ ಒಮ್ಮೆಯಾದ್ರೂ ಇವುಗಳನ್ನ ಸವಿಯದೇ ಹೋದ್ರೆ ಸಮಾಧಾನವೇ ಇರಲ್ಲ. ಹೈದ್ರಾಬಾದ್‌ ಹೈಕೊರ್ಟ್‌ ಮುಂದೆ ಒಂದು ಚಿಕ್ಕ ಟೀ ಸ್ಟಾಲ್, ಪುಟ್‌ಪಾತ್ ಬದಿಯ ಅಂಗಡಿಯಾದ್ರು ಯಾವ ಫೈವ್‌ ಸ್ಟಾರ್‌ ಹೋಟೆಲ್‌ಗೂ ಕಮ್ಮಿಯಿಲ್ಲದಂತೆ ಚಹಾ ಮಾಡ್ತಾನೆ. ಥೇನ್‌ ಮಾರುತಗಳ ಪ್ರಭಾವವೋ ಏನೋ ಅಂದು ಮೋಡ ಮುಸುಕಿದ ವಾತಾವರಣವಿತ್ತು. ತಂಪು ಹೊತ್ತಲಿ ಇರಾನಿ ಚಹಾ ಕುಡಿತಾ ಯಾರ್ಗೋ ಕಾಯ್ತಾ ಕುಳಿತಿದ್ವಿ. ಕಾಯೋದೆ ನಮ್ಮ ಕೆಲಸದ ಭಾಗ ಅಂತಾ ಎಷ್ಟೋ ಬಾರಿ ಅನ್ನಿಸಿದೆ.ಕಾಯಿಸುವವರನ್ನೂ ಯಾರು ಪ್ರೀತಿಸಬಾರದು ಅಂತಾರೆ, ಆದ್ರೆ ನಾವು ಕಾಯಿಸುವವರನ್ನ ದ್ವೇಷಿಸೋಕು ಆಗಲ್ಲ. ಅದರಲ್ಲೂ ಸಿಬಿಐ ಕಚೇರಿ, ಚಂಚಲಗುಡ ಜೈಲು, ಸಿಬಿಐ ಕೋರ್ಟ್‌ ನ ಮುಂದೆ ಕಾಯ್ದಿರೋದು ನನ್ನ ಮಟ್ಟಿಗೆ ಅದೇ ಸಾಹಸವೇ.
...

ಹೀಗೆ ಕಾಯ್ತಾ, ಚಹಾ ಕುಡಿಯುತ್ತಾ ನನ್ನ ದೃಷ್ಠಿ ಅದೇ ಪುಟ್‌ ಪಾತ್‌ ಮೇಲೆ ಕೂತಿದ್ದ ಚಪ್ಪಲಿ ಹೊಲಿಯುವವನ ಮೇಲೆ ಬಿತ್ತು. ಕುತೂಹಲದಿಂದ ಅವನನ್ನೇ ನೋಡ್ತಾಯಿದ್ದೆ. ಹೈಕೋರ್ಟ್‌ ಇದ್ರೂ ಅದು ಚಿಕ್ಕ ರಸ್ತೆ ಆಗಿದ್ರಿಂದ ವಾಹನ ದಟ್ಟಣೆಯೂ ಜಾಸ್ತಿಯಿತ್ತು. ರಸ್ತೆಯ ಮೇಲೆ ಹೋಗುವ ಬರುವ ಪ್ರತಿಯೊಬ್ಬರನ್ನ ನೋಡುತ್ತಾ ಕುಳಿತ್ತಿದ್ದ ಈ ಚಪ್ಪಲಿ ಹೊಲಿಯುವಾತ. ಅದ್ಯಾಕೆ ಹಾಗೆ ಜನರನ್ನ ನೋಡ್ತಾನೆ ಅನ್ನೋ ಕುತೂಹಲದೊಂದಿಗೆ ಸೂಕ್ಷ್ಮವಾಗಿ ಅವನ ಕಣ್ಣುಗಳನ್ನೇ ದಿಟ್ಟಿಸಿದೆ. ಅವನ ಕಣ್ಣಿನಲ್ಲಿ ಹಸಿವನ್ನ ನೀಗಿಸಿಕೊಳ್ಳುವ ಹುಡುಕಾಟ ಇತ್ತು. ಅರ್ಥಾತ್‌ ಆತ ನೋಡ್ತಾಯಿದ್ದಿದ್ದು ಚಪ್ಪಲಿಗಳನ್ನ. ಯಾರದ್ದೋ ಚಪ್ಪಲಿ ಹರಿದಿದ್ರೆ ಅದನ್ನ ಹೊಲಿದು ತನ್ನ ಹೊಟ್ಟೆ ತುಂಬಿಸಿಕೊಳ್ಳುವ ಹಪಾಹಪಿ ಅವನದ್ದು. ಆ ಕ್ಷಣಕ್ಕೆ ಅನ್ನಿಸಿದ್ದು “ ಹರಿದ ಚಪ್ಪಲಿ ಅವನ ಹಸಿವು ನೀಗಿಸುತ್ತೆ, ಹಾರುವ ಸುದ್ದಿ ನಮ್ಮ ಹಸಿವು ನೀಗಿಸುತ್ತೆ” ಅಂತಾ. ನಾವಿಬ್ಬರೂ ಮಾಡಿದ್ದೂ ಒಂದೇ ಅದೇ ಹುಡುಕಾಟ. ಅವನು ಚಪ್ಪಲಿ ಹುಡುಕಿದ, ನಾನು ಸುದ್ದಿ ಹುಡುಕಿದೆ. ಎಲ್ಲಾರು ಮಾಡೋದು ಹೊಟ್ಟೆಗಾಗಿ ಗೇಣು ಬಟ್ಟೆಗಾಗಿ ಅನ್ನೋ ಹಾಡಿನ ಅರ್ಥಪೂರ್ಣ ಸಾಲುಗಳು ನೆನಪಾಗಿ ನನ್ನೊಳಗೆ ನಾ ನಕ್ಕು ಸುಮ್ಮನೇ ಹುಡುಕಾಟ ಮುಂದುವರೆಸಿದ್ವು. - ದಶರಥ್ ಬಿ ಎಲ್‌‌